|
Da numerus pajais vegnivan giasts prominents: ils retgs da la Belgia e Spagna per exempel, numerus schefs da stadi, ministers ed auters dignitaris sco il Lord Mayor da Londra.
Il pievel engrazia a la Providientscha
Tgi che vuleva passentar in mument senza ils uffants, als pudeva laschar en il Kinderparadies. Là era ina tscherta Trudy Gerster – oz enconuschenta en l'entira Svizra sco Märlifee - gist vidlonder da sa far in num sco raquintadra d'istorgias. Tgi che vuleva ruassar in pau, pudeva seser sin sutgas d'aluminium perfurà. Questas famusas sutgas da la Landi èn oz puspè en vendita. Il lieu il pli popular era il vitget da la Landi. A la festa federala da costums eran là 160'000 visitadras e visitaders.
En il „Palais des attractions“ procuravan Teddy Stauffer ed il legendar cabaret „Cornichon“ per divertiment. Il 1. da settember, il di da la mobilisaziun generala, è il dumber da visitaders da la Landi sa reducì cun in culp. Ma gia suenter 15 dis era la Landi puspè sa revegnida: davent da quel mument èn ils Svizzers s'inscuntrads a las rivas dal Lai da Turitg per sa dar forza e far curaschi. "En quest temp difficil engrazia l'entir pievel a la Providientscha d'avair rinforzà la conscienza da la naziun cun l'exposiziun naziunala“, ha declerà en quest connex il fundatur da la Migros, Gottlieb Duttweiler.
|
